நமது சூரிய குடும்பத்தில் மர்மங்களைப் புரிந்து கொள்ள, சைக்கி (Psyche) என்ற விண்கலம் 2023 அக்டோபர் 13 ஆம் தேதி, அமெரிக்காவின் கென்னடி விண்வெளி மையத்தின் ஏவுதளத்திலிருந்து ஸ்பேஸ்எக்ஸ் ஃபால்கன் ஹெவி ராக்கெட்டின் மூலம் விண்ணில் செலுத்தப்பட்டது. இந்த விண்கலம் வியாழன் மற்றும் செவ்வாய் ஆகியவற்றுக்கு இடையேயுள்ள 16-சைக்கி என்ற ஒரு உலோக வகையிலான விண்கல்லை நோக்கிப் பயணம் செய்கிறது. இது 2029 முதல் இந்த விண்கல்லை ஆய்வு செய்யும்.
சைக்கி விண்கலத்தின் தகவல் தொடர்பு
பூமியை விட்டு வெகு தொலைவில் இருந்தும் கூட பூமியுடன் தொடர்ந்து தொடர்பில் இருப்பதற்காகச், சைக்கி விண்கலம் ஒரு புதுமையான தகவல் தொடர்பு முறையைக் கொண்டுள்ளது.
ஆழ்வெளி ஒளித் தொடர்பு (Deep Space Optical Communication )
சைக்கி விண்கலத்தின் முதன்மைத் தகவல் தொடர்புத் தொழில்நுட்பம் ஆழ்வெளி ஒளித் தொடர்பு என்பதை அடிப்படையாகக் கொண்டது. இந்த நவீன அமைப்பு, வழக்கமான வானொலி அலைத் தகவல் தொடர்பு முறையை விட மிகவும் மேம்பட்டது. இந்த முறையில் தகவல்களை ஒளியணுக்களின் (photons) வாயிலாக அனுப்ப அருகாமை-அகச்சிவப்பு (near infrared) லேசரைப் பயன்படுத்துகிறது. கிட்டத்தட்ட 1.6 கோடி கிலோமீட்டர்கள் தொலைவில் இருந்தும் (புமியிலிருந்து நிலவு இருப்பதைக் காட்டிலும் சுமார் 40 மடங்கு அதிக தூரம்) லேசர் மூலம் தகவல்களை வெற்றிகரமாக, கலிபோர்னியா தொழில்நுட்பக் கழகத்தின் (Caltech) பாலோமார் வானோக்கி மையத்தின் ஹேல் தொலைநோக்கிக்கு அனுப்பியுள்ளது.
ஆழ்வெளி ஒளித் தொடர்பின் மூலம், விண்வெளித் தொலைத்தொடர்புகள் பயன்படுத்தும் தற்போதைய வானொலி அதிர்வெண் அமைப்புகளை விட 10 முதல் 100 மடங்கு அதிகமான தகவல்களை ஒளி வாயிலாகப் பரிமாற்றம் செய்ய முடியும்.
வானொலி அலைகளுக்குப் பதிலாக ஒளியைப் பயன்படுத்துவதன் மூலம், குறைந்த நேரத்தில் அதிகத் தகவல்களைப் பகிர்ந்து கொள்ள முடிகிறது. இது உயர்தரமான படங்கள் மற்றும் வீடியோக்களை அனுப்புவதற்கு அவசியமாகிறது.
மேலும் இந்த விண்கலத்தில் ஆழ்வெளி ஒளித்தொடர்புடன் (DSOC) கூடுதலாக, ஒளி வாயிலான தொடர்பு துண்டிக்கப்பட்ட சமயங்களில் பயன்படுத்துவதற்கென, வழக்கமான வானொலி அலை அதிர்வெண் (radio wave frequency) அமைப்பு சைக்கி விண்கலத்தில் பொருத்தப்பட்டுள்ளது. இதில்,
மாக்ஸார் நிறுவனத்தால் வழங்கப்பட்ட 6.5 அடி (2 மீட்டர்) நிலையான உயர் ஈட்டம் (high gain) கொண்ட ஆண்டெனா மற்றும்
ஜெட் ப்ரொபல்ஷன் ஆய்வகம் வடிவமைத்து தயாரித்த மூன்று சிறிய ஈட்டம் (low gain) கொண்ட ஆண்டெனாக்கள், ஆகியவை அடக்கம்.
லேசர்கள் வானொலி அலைகளை விட அதிக அதிர்வெண் கொண்ட அகச்சிவப்பு ஒளியைப் பயன்படுத்துகின்றன. எனவே அவை ஒவ்வொரு விநாடியும் அதிக தரவை அனுப்ப முடியும். இது பெரிய அளவிலான தரவை, எடுத்துக்காட்டாக, கோள்கள் மற்றும் நிலவுகளின் விரிவான படங்கள் மற்றும் காணொளிகளை அனுப்பத் தேவையான வேகமான விண்வெளி அலைப்பட்டையை (space broadband) உருவாக்க முடியும். லேசர்கள் தற்போதைய வானொலி அலை அமைப்புகளை விட 100 முதல் 1000 மடங்கு அதிக தரவைக் கொண்டு செல்ல முடியும்.
லேசர்கள் மிகவும் குவிந்த கற்றைகளைக் கொண்டவை. அதாவது விண்வெளியில் உள்ள செயற்கைக்கோள் மற்றும் பூமியின் தரைக் கட்டுப்பாட்டு நிலையங்கள் இரண்டிலும் சிறிய அளவிலான ஆண்டெனாக்களைப் பயன்படுத்தினாலே போதுமானது.
சமீபத்தில் சைக்கி விண்கலத்தின் ஆழ்வெளி ஒளித் தொடர்பு, அதன் லேசர் மூலம் பூமிக்கு சோதனைத் தகவல்களை அனுப்பியது.
இது அதிகபட்சமாக வினாடிக்கு 267 மெகாபிட்ஸ் (Mbps) என்ற வீதத்தில் தகவல்களை அனுப்பும் திறனைக் காட்டியுள்ளது. இது பிராட்பேண்ட் இணையத்தின் பதிவிறக்க வேகத்திற்கு இணையானது.
—–
1.” பிரபஞ்சத்திற்குள் ஒரு சுற்றுலா “
https://notionpress.com/read/pirapanjathirkul-oru-sutrula
2. “விண்வெளிப் பயணங்களின் வரலாறு”
வானியலின் அதிசயங்கள் 